واصل الفنان هشام ماجد في الجزء الثاني من لقائه ببرنامج “أسرار” الذي تقدمه الإعلامية أميرة بدر على قناة النهار، تصريحاته المثيرة للجدل حيث كشف عن رأيه في مهنة الهندسة والعاملين بها، بالإضافة إلى رايه في نجم العمل الأوحد، مؤكداً أن الفنان أحمد الفيشاوي له فضل عليه وعلى زميليه شيكو وأحمد فهمي في بداية مشوارهم الفني.
وقال هشام في تصريحاته بالبرنامج:
– من صغري نفسي أبقى مشهور كنت بتفرج على اللعيبة والممثلين وأقول نفسي أبقى مؤثر أوي، واكتشفت موضوع التمثيل متأخر ودخلت هندسة.
– مكنتش محتاج التمثيل ماديًا، المهندس بيبقى شايف نفسه فوق الناس، رغم إن هما ناس عادية جدًا، وفيه مهندسين تعبانين وأغبياء.
– مصطفى غريب شاطر وبيستغل الفرص الحلوة، وكان دوره صغير وعمل لنفسه مساحة كبيرة، وعدد مشاهده كانت أقل من كده، وابتدى يطلع لزمات وسكة للدور، وخالد وشيرين دياب سابوه يعمل كده.
– بكره الأعمال اللي بيبقى فيها نجم وكله بيخدم عليه، بحب كل الموجودين له لازمة ومهم في المشهد، وبحاول أعمل كده، وده بيدي للعمل قيمة أكبر.
– شهوتي شراء الجزم وساعات بيبقى مالهاش لازمة وأنا وعمرو سلامة فينا الموضوع ده، عندي حوالي ٦٠ جزمة وحاططهم على الأرض، ومراتي بتضايق من ده.
– بقف في المراية كتير وأتأكد إني كويس، مبشوفش نفسي حلو وكتر خير اللي بيشوفني حلو.
– مبحبش تغيير الشكل والعمليات، إلا لو عندك عيب مضايقك أوي.
– مش زعلان من أحمد فهمي عشان أعاتبه، وهو بيكلمني كتير، وأنا اللي مقصر معاه، وطالع معاه ضيف شرف.
– عندي فيلم في العيد، اسمه “فاصل من اللحظات السعيدة”.
– كبريائي منعني أقبل حاجات مش كويسة بفلوس كتيرة أو إني أسيب منتج عشان أروح لمنتج تاني فلوسه أكتر، والكبرياء شبه العند.
– أنا برج الثور وساعات أعند عشان مرجعش في كلمتي، وكان زمان يخليني ماعتذرش، لكن دلوقتي كبرت وفهمت، اتأسفت لناس كتير زي مراتي وأمي، وكلمه آسف مش عيب بالعكس بتكبرك.
– أحمد الفيشاوي أكتر حد وقف معانا وقفة جدعنة كنا لسة مش معروفين وهو كان نجم أوي ساعتها، وافق على كل حاجة مقابل إنه يقف جنبنا، وشايله ده جدًا.
-الفيشاوي مش مظلوم فنيًا لانه بيعمل أفلام كتير ممكن يكون ناقصه يعمل مسلسلات”.