مواقف نبيلة اعتدنا عليها من قِبل شباب الصعيد، فدائمًا وأبدًا ما نجد مثل هذه الشخصيات التي تتميز بالشهامة والمروءة، فشاب يعمل في تجارة الفاكهة، تربطه علاقة إنسانية مع رجل مسن، دخل مجال التجارة مؤخرًا، بهدف تحسين دخله، ومن جانب آخر يعمل على توك توك، لتوفير ما يقدر عليه من أموال له ولأسرته، فكان سيتم سرقة التوك توك لولا تدخل الشاب.
حسن أبو هشيمة، البالغ من العمر 24 عامًا، ابن مركز الفشن التابع لمحافظة بني سويف، قال خلال حديثه مع «»، إنه فعل ذلك الموقف النبيل لوجه الله، ليس إلا، مشيرًا إلى أنه يعمل في مجال الفاكهة وصاحب محلات تجارية لبيع الفواكه بمدينة الفشن، قائلًا: «إن بالصدفة الراجل اللي كان هيتسرق التوك توك بتاعه ده، فكان بيشتري مني زرع وبضاعة وكدة».
خروج «حسن» لتحصيل أموال الفاكهة
وبطبيعة ظروف عمل «أبو هشيمة»، بأنه بعد صلاة العشاء، يخرج من منزله متجهًا للتجار لتحصيل أموال الفاكهة التي يشترونها منه، «بطلع بعد العشا ألم التحصيل»، راويًا تفاصيل ما حدث، «أنا رايح أحصل الفلوس وشوفت الواد الحرامي ده، وأنا شوفت كتير وقليل، والواد كان واقف وباين عليه إنه مش طبيعي، عمال يدخل التوك توك ويطلع منه».
استغراب صاحب التوك توك
وبحسب «حسن»، فإن صاحب التوك توك، في مراحل عمرية كبيرة وحديث في مجال تجارة الفاكهة، «صاحب التوك توك راجل كبير في السن، ولسه داخل المهنة جديد، ومش ابن سوق، بقوله يا عم أشرف الواد اللي عمال يلف حوالين التوك توك ده شكله مش طبيعي وباين عليه غريب عن المنطقة، بقا عم أشرف مستغرب».
عصبية صاحب التوك توك
الشاب العشريني أكمل حديثه، بأنه توجه لمن يلتفت حول، «روحت قولتله إنت بتعمل إيه هنا؟، لقيته بيقولي دة التوك توك بتاع أخويا، قولتله بتاع أخوك إزاي يعني؟، جبت عم أشرف وقولت له بتاع مين التوك توك؟، عم أشرف قال والله بتاعي، والواد الحرامي بقا عاوز في دوكة، راح عم أشرف اتنرفز عليه وقاله يا بني بقولك التوك توك بتاعي».
حرص «أبو هشيمة» على التحفظ على المشتبه فيه بسرقة التوك توك، وبادر بتفتيشه، «قعدت أفتشه ملقتش معاه حاجة غير شريطين مسكن، وبرشام تاني غريب كده، روحت اتصلت على أمين شرطة، وكشفوا عليه في المركز طلع عليه قواضي سرقة قبل كدا، وقبضوا عليه وعملوا له محضر والشرطة هتظبطه».
صاحب التوك توك وشكره للشاب العشريني
«عم أشرف» صاحب التوك توك، قال، خلال حديثه لـ«»، إنه مُدين بالشكر والثناء للشاب حسن، الذي حرص على بقاء التوك توك الخاص به؛ لأنه يعد أحد أهم مصادر رزقه، قائلًا: «أنا مش عارف من غير اللي عمله حسن ده أنا كنت هعمل إيه؟، ربنا يبارك فيه وفي صحته ويحفظه لشبابه، ده شاب محترم وشهم، وابن أصول».
وبكلمات مليئة بالثناء والاحترام للشاب العشريني، اختتم «عم أشرف» حديثه قائلًا: «بداية معرفتي بحسن كانت من خلال الشغل هو بيجي يحصل مني فلوس تجارتي وشغلي في الفاكهة، يعني العلاقة بينا شغل وبس، لكن هو بيصون العِشرة والعيش والملح، ربنا يحفظه يا رب، ويخليه لشبابه».