أسد مغمض العينين، يظهر داخل أحد عروض السيرك كأنه يغط في نوم عميق، تلك الصورة التي أثارت حالة من الهجوم الشرس على مدربة الأسود الشهيرة فاتن الحلو، عبر صفحات السوشيال ميديا، خاصة الجروبات الخاصة بالرفق بالحيوان.
وتداول حساب «حملة رفق في القاهرة والجيزة»، صورة للأسد، معلقًا عليها: «الصورة من سيرك محاسن الحلو في المعادى، أنثى الأسد نامت في وسط العرض، لأن ده الوقت الوحيد اللي عرفت تنام فيه من غير ضرب ولا كهرباء ولا تعذيب ولا تجويع، اتحامت في وجود الناس ونامت وهي واقفه.. الصورة دي تستوجب التحقيق العاجل والعقاب».
تعليق فاتن الحلو على صورة الأسد النائم
وأوضحت فاتن الحلو، كواليس الصورة، بأن الشخص الذي التقطها، كان منزلها بضحك الأول، لكن الناس قلبتها بالشكل ده وروجوا شائعات كاذبة أن الأسد بيتعذب، مضيفة: «الأسد ده كان مبتسم، ومرتاح جدا في الصورة مش تعبان زي ما الناس فاكرة».
سر نوم الأسد
وعن سر نوم الأسد وإغماض عينيه، ردت مدربت الأسود، خلال حديثها لـ«»: «اللي لقط الصورة كانت لحظة ضرب إضاءة الليزر في عين الأسد، فأول ما غمض عينيه اتاخدت الصورة، لكنه كمل العرض بطريقة طبيعية جدًا».
«الأسود دول ولادي إزاي أعذبهم؟!».. هكذا أبدت «فاتن» تعجبها من الشائعات التي يروجها أعداء النجاح على حسب وصفها: «أنا بتعامل معاهم زي عيالي وبجيبلهم أكل وشرب ودكاترة وبهتم باستحمامهم».
«اللقطة دي كانت من حوالي يومين تلاتة في السيرك اللي في المعادي، وأنا ليا تقريبا شهر بس في المكان، لكن محاربي النجاح هما السبب في ترويج الشائعات»، كما تحدثت مدربة الأسود: «اللي بيهاجموني دول مأثروش فيا بالعكس ساعدوني في عمل دعايا مجانية، لأنهم مستحيل يهزوا سنوات شغلي الطويلة في مجال تدريب الأسود».